冇錢?撳馬會啦

2026 年 1 月 23 日

曾智華

眨吓眼又到新年,為吸引遊客及製造祥和興盛氣氛,當然要燒煙花。

但政府預算中,並冇燒煙花呢項支出,咁點?抌心口!抌邊個?非常視乎當時邊個想威又負擔得起,咁就一於抌佢。

大家可知,如今幾乎已消失咗的亞洲電視,也曾於1989年贊助煙花大匯演,之後不少國企財團也曾慷慨贊助。

不過,搞搞吓,你知我知,內地經濟都唔係幾掂,尤其所有內房集團,慘到喊十聲。但煙花匯演必須繼續跳舞,特別是近年香港人的士氣及情緒,著實需要提高。

大埔宏福苑沖天大火慘劇後,經已取消了去年除夕煙花匯演。如今一切開始慢慢恢復,理應重新營造農曆年的歡樂祥和氣氛。

咁搵邊間機構贊助好呢?老友,成1900萬元㗎,你估少嘢?

歷來政府有一條水喉,需要就開。例如大型建設計錯數,水乾埋唔到尾。此時,高官就會走去「撳」馬會。近年最攞膽的,當然是西九文化區。

不過,馬會董事及管理層個個挑通眼眉,絕不會齋被撳,一定乘機食住上,有反要求。

例如,增加賽馬日,增加海外賽事轉播,增加足智彩場數,盡快開埋籃球博彩。

總之,你有求於我,撳我,就唔該識做。

講吓笑,日後可能開埋網球、羽毛球、乒乓球、滑雪⋯⋯等體育博彩未定㗎,哈哈!

上周日本欄貼士幾乎全仆直,隻「超開心」搏到甩髀都只能入Q,輸個鼻,無奈。

但當日告仔隻「爆出美麗」震驚全場,因W13倍而P竟曾出現1.0!即有天文數字過落P處,唔知金額幾多,只知過終點一刻,可能有人心臟病發要送院急救。

今晚食泥,難有心水,用張福元口頭禪——勉強提供「滿心星」WP,博牌仔減五磅走甩。