眾多電影片種中，我最喜歡睇愛情片，因差不多全是美男美女加美麗景色，兼且非常正能量，將人性光輝推到極至。
本來若上述情況處處都係，咁就冇乜特別喇，但正正是現實中的男女及夫妻關係，越來越求求其其。故此，當我聽見新人宣誓時講到：「從今天開始，無論順逆貧富，健康疾病，我將永遠愛你，珍惜你，直至永遠！」就忍不住會笑。
無他，印證所見到的，新人的關係發展下去，結婚誓言起碼有三分二會變「食生菜」。事實，今天社會的離婚率年比年高，很快就有一半人結完婚又離婚。就算冇離的，心照，也起碼超過一半，做唔到誓言內的承諾。
故此銀幕上的愛情故事，描寫成此志不渝海枯石爛，才會觸動觀眾，因現實相當稀有。
不過，稀有並不代表罕有或冇，只是絕少發生在年輕情侶或夫婦之間，因佢哋仍需要真真正正面對過順逆貧富及健康疾病的深切考驗。
現實上動人的愛情故事，多年來親眼見不少，但並非年輕靚仔靚女，而是在護老院及街坊公園。
我每朝皆到紅磡高山劇場運動拉筋，過去七、八年，每朝皆見一位年約80歲的阿伯，用盡全身氣力，將一位明顯中過風又無大反應的婆婆（應該是太太啩），緩慢地推上斜路，直達有健身設備的場地。然後先替婆婆按摩手腳，再協助佢將無大反應的手手腳腳運動一番。
大約一小時後，又再非常吃力地推婆婆下斜坡離開。
日復一日，默默無言的做呀做。
三個月前，伯伯仍日日推輪椅上公園頂的運動場地，但輪椅內，竟是空空的。
伯伯為乜冇咗心愛的人，仍日日默默無言準時推輪椅上公園呢？我想，背後應有個偉大的愛情故事！
