曾智華
揼心揼肺，揼心揼肺，幾乎揼到肺都穿！
乜事？正是上周日賽事，跑完第九場後，小弟手機被洗版式恭賀。恭賀乜？恭賀我因「慧眼貼正老馬爆大冷」。
事緣12月23日跑馬地夜馬，我在本欄實牙實齒指出——「發財先鋒」是奇馬，已經8歲，照理應該早早退役，冇退，即幕後肯定佢仍有出頭機會，雖則已三季未W過。「發財先鋒」乃長途氣袋，最當打時可跑一級賽，亦曾W三級賽，卡士極高，爛船也應有三斤釘。
結果當晚跑二千二百米大長途，畀杜苑欣打到飛起入第三。
我有冇中？中少少P，不足掛齒。但之後決定衰晒，覺得老馬搏咗一大劑，肯定又有排回氣，再睇睇今仗賠率，閘前二十七倍（最後二十二倍），心諗，越買越冷，邊有咁大隻蛤乸隨街跳啊，今次慳返先。
結果慘情！原來幕後忍足三季，由一百一十八分減到六十二分，今次才郁手，一擊即W！
無奈走大雞，就算佢唔退役，以後都唔買啦，人有人緣，馬有馬緣，無謂勉強。
當日「軟硬鞭」又大殺三方，排外檔都任佢贏，你冇得咬佢。另一端，包尾大幡潘大衛繼續扮演「零W機器」，難得「善長」練馬師方嘉柏，今晚仍彈隻上場剛勝的「鈁糖武士」畀佢，此馬已7歲，肯定遊馬河。
今晚重點賽事為跑三級的一月盃。呢種讓磅場合，最少要選一匹輕磅馬，因絕大機會篤爆高分馬。
沈集成出兩隻，早早卜定潘頓騎「智勇神駒」及布文騎「喜蓮勇感」，當然有個布局啦。
咁邊隻有機會篤爆兩條大鱷騎師？當然係凡跑讓磅級制賽就有神來之筆的巴度，今晚騎榜尾練馬師丁冠豪的「大浪圖田」，我睇最少入位，就算中埋Q也不意外。
