港人已經被「寵壞」?

2026 年 11 月 9 日

秋季一到,當然頻頻出發,享受最舒適的旅遊時光。小弟只由每年10月玩到4月,5月開始收工,老友,身水身汗,邊有樂趣四圍貢呢?旅行並非捱苦,應該次次皆享受!

寫此稿時,身處台東。

多年冇來,竟然一切依舊,仿似走入時光隧道,老建築冇變,街道冇變,景點冇變,連街上市民的裝扮外形也五十年不變。

入住最新的酒店,裝修也有陣陣舊式味道,相比大灣區近年紛紛落成的五星酒店,就感覺而言,仿似是處身兩個世界。不過,點解咁多人喜歡到台灣?可能就因為有一種真正不變的品味、風貌、文化及價值觀。

誠意推薦,想懷舊,去台東(台南也可)啦。

香港人遊台灣,最最最不習慣為——處處冇垃圾桶。你話我哋已被寵壞好,香港制度便民好,總之,香港就是去到邊都幾米至十幾米就有一個垃圾桶,有乜要掉,行兩步就得。

台灣?已成功推行垃圾不落地,絕對冇人在大街大巷隨處掉垃圾。所以,小弟遊台,也必定入鄉隨俗,背包永遠有塑膠袋裝廢物用,這也是作為一個遊客的基本禮貌。香港經常自稱「國際城市」,但在處理廢物方面,小至普通街道,大至焚化設備,仍落後得令人汗顏。

今次入住台東「趣淘漫旅」(酒店),也體驗到一種文化,不單自己垃圾自己處理,連早餐用過的一切,也要求客人自己搞掂。

如今全球旅遊城市,呢招看似中小學生食堂的規矩,實在非常罕見。

早晨自助餐,一切碗碟匙筷用具先自取,然後選擇食物,食完,規定客人將所有東西捧到收集區分類,幾個大膠盤標明放乜。

老友,若香港大酒店行呢招,掂唔掂呢?若堅決執行,又有冇客人會去幫襯呢?