MIRROR成員Jeremy（李駿傑）昨日現身香水品牌活動，除咗分享自己嘅用香心得，話題好自然就轉到去剛參加完嘅隊友Stanley（邱士縉）峇里婚禮。Jeremy不但自爆封咗一封五位數港幣嘅大利是做人情，更深情透露婚禮當日嘅感動時刻，由中午一直喊到夜晚。
本文核心內容：
- Jeremy透露在Stanley婚禮送出五位數大利是，自言是人生中最豪一次。
- Jeremy分享在峇里婚禮上，從中午感動到夜晚，多次落淚。
- Jeremy推舉隊友Anson Lo為「香香公子」，大爆遠遠已聞到其專屬香味。
五位數大利是 見證兄弟情誼
講到好兄弟Stanley嘅婚禮，Jeremy坦言今次做兄弟團絕對落足心機，除咗幫忙頂酒、參與表演，更包咗一封五位數港幣嘅大利是做人情。佢豪言呢次係暫時人生中送過最豪嘅一次，做齊所有嘢兼送大封人情，充分展現講義氣嘅一面。
峇里婚禮 感動由朝到晚
Jeremy笑認喺峇里出席婚禮當日，情緒相當澎湃，由中午開始已經忍不住流淚，一直喊到夜晚。佢話睇到新人嘅「Thank You」卡感言時，感覺就好似望住自己哥哥家姐結婚一樣咁感動。佢亦自爆冇諗過大家影相時，自己會忍唔住喊，更爆料Edan（呂爵安）全程喺旁邊「觀察人哋喊」，而姊妹團更係全體落淚。
婚禮表演與兄弟互助趣事
提到婚禮當日驚喜跳唱《BAD》，Jeremy大讚Jer（柳應廷）係舞蹈擔當，Jet老師教嘅震胸舞佢「一堂就搞掂」！Jeremy仲分享自己為咗大表哥Stanley破戒幫手頂威士忌，笑言：「我冇醉！雖然姊妹團有準備解酒藥，我只係少少頭暈啫，Anson Lo同Tiger（邱傲然）都有幫手頂酒！」佢坦言成趟行程比做演唱會更忙，最大得着係「下次千祈唔好搞咁遠！」
推舉「香香公子」Anson Lo
活動上，Jeremy推舉隊友Anson Lo做「香香公子」，大爆遠遠已經聞到好大陣「Anson Lo味」。至於講到送香水，佢就話一定會送畀新婚嘅隊友Stanley。佢又幽默回應近期「錢太多」嘅話題，笑言歡迎大家「攞錢撻我」。
