曾智華
近日上網睇美國新聞政治節目，全部只講一個主題——中期選舉大勢。左中右紅藍皆如此，雖然立場有所不同，但其基調都隱隱傳出——今次共和黨大鑊！政治乃眾人之事，也是百分百現實利益爭奪，選民如此，政客更是如此。
政客冇選票，立即冇咗權力，冇Say也冇機會「掠水」（若侵侵不是總統，佢成個貪婪家族會點？）。所以，幾大要拉選票，再核突肉麻招數都要使出，一切能令佢哋當選的事都瞓身做，一切令佢哋落馬的，幾大唔做，乜底線都唔講。
就此，「忘恩負義」情況紛紛出現。最明顯，兩年前大受共和黨政客歡迎，一見就幾乎要跪拜的「皇帝」侵侵，如今雖未變「過街老鼠」，但在不少共和黨的現實政客眼中，開始有點「佗衰家」。因為侵侵擺明越來越失民心、乞人憎，支持度得返三成，黐住佢，在普及選舉哪裏會有運行。
就此，不少共和黨候選政客，皆暗暗與侵侵割離，傳媒廣泛報道，稱之為與侵保持「策略性距離」（Strategic Distance）。
講穿，到底侵侵仍是總統，手執大權，與佢反面冇著數。但若佢走埋你身邊替你拉票，咁就肯定變倒米。點搞？唯有見侵侵出現即側側膊閃開，保持距離。冇禮貌的市井人會叫做「見侵彈開」，有少少修養的，則叫保持「策略性距離」，明唔明？
選民跟紅頂白，也令侵侵極冇癮。因佢自以為風塵僕僕，千山萬水，不停飛半日到各山旮旯偏遠州份替候選人拉票，在數萬人體育館出現，必定逼爆，一票難求。
慘豬豬。如今？傳媒最無情，不停影住有幾多「夏韶聲名曲」——空櫈。唔好問點解，你應知老侵過去兩年做過乜！