(曾智華)
今晚快活谷有場馬，唔好投注，但會好好睇，正是第六場二班一千米。
十隻馬出賽，當中八隻有機會入位，好可能到最後五十米仍未能分出勝負。講牌面，「天天同樂」及「好好戀愛」贏面壓一。
羅富全馬房開始進入狀態，今晚出六隻，四隻有機會W。呢場雙龍出海，潘頓騎「天天同樂」，此程兩出兩W，上場沙田三級賽入P，狀態頂峰，今次回落二班，雖孭重磅，但不會出嚟遊馬河。廄侶「馬力」也不能忽略，此程兩W三Q，擺明擅長，上次沙田一千米W出，呢場去唔去或點去，要睇幕後心意。若去，穩P。
至於「好好戀愛」，此程逢出必拼，出五次，一W一Q兩P，今次升班減磅用巴度，也有明顯出擊意欲，排四檔，必定要選。
告東尼馬房久沉，今晚出「八駿巨昇」，乃快活谷一千米專家，出五次三W一P，今季初出主攻強項，排一檔，開閘搶放，盡量令其他馬食塵，且看是否如此部署，早前試閘第一。
黃寶妮今季表現麻麻，成績遠不及師妹袁幸堯，但與今場的「好評如潮」非常夾，跑一次快活谷一千米即入Q。上場以沙田千二米熱身，今次回跑強項抽三檔，W未必掂，但此馬頗具鬥心，5歲，仍在進步中。黃寶妮鬥志不用懷疑，唔飛得。
徐雨石馬房「燭光晚餐」也是此程，馬已6歲，必須等待形勢有利，才擇肥而噬。上季兩W，一千仍能入Q入P，但皆非經蔡明紹手，故此，只可視為冷門，信心普通。
蔡廄「俏眼光」馬高質，但非此程馬，應是熱身。
綜合，呢場我用「天天同樂」、「八駿巨昇」、「馬力」、「好好戀愛」及「好評如潮」買複式二重彩，五蚊雞注，一百大元，睇吓有冇得嗌！