黃秉華
美國AI企業仍領先中國同行，吓哇，你唔好起勢咁講，首先是認識清楚，美國AI的所謂領先，可能係在實驗室跑出來的數據，但重點係好難落地的，如是者，「領先」是空虛寂寞，成日提到上世紀七十年代美國軟硬天師——硬件的蘋果教主喬布斯，軟件的蓋茨，先後參觀Xerox設在史丹福大學的PARC實驗室，那一台Alto先進個人電腦，各自本事把原型模型落地，成為普及商品，如此這般，個人電腦時代方可誕生。
如果任由PARC那班工程師繼續研發更勁、更刁鑽的新型號，都是枉然，事關造出來的Alto要買6萬美元以上，當你呢個個人電腦跑贏全世界，又點樣？冇人買得起嘛。一理通，百理明，成日講美國AI有幾先進，幾時輪到你講，美國AI係咪大眾都用得起先？這個係關鍵，事關美國AI巨頭企業不是開源的，可以貴到發展中國家都買唔起，反觀，一味話中國AI仲未追得上美國，但係中國AI是開源的型號，市場力量就是力量，最多人使用，必然Sure Win，所以蓋茨的視窗系統配搭IBM PC，只售1,565美元，話之你PARC的個人電腦有幾勁，都不外是「科技博物館」的陳列品而已。
喬教主第二次掌舵蘋果公司，推出iPhone，如果不是中國代工生產，閒閒哋又賣幾萬美元一部，iPhone最終鬥得過深圳的山寨手機嗎？如今矽谷Anthropic最先進模型，成本為DeepSeek和小米新模型的二十至五十倍，你還好意思話美國AI還在領先？更厚面皮說中國「蒸餾」了矽谷的技術，無語了。