曾智華 精彩人生自己創
人生匆匆，不時旅途上會遇到有趣的人或事，近兩年小弟巧遇許冠文太太鄭潔英（P姐），並一同外遊。
外遊，相處時間特多，尤其晚餐，若坐埋一起，兩杯到肚，自然談興極濃。
一頭紫髮的P姐平時唔聲唔聲，但一開聲，可能嚇你一驚，例如佢話：「係我五十年前追許冠文（M哥）嘅。喂，見到高質素好男仔，當然採取主動啦，等乜？等吓等吓，容乜易畀人搶咗去㗎，冇咁笨呀。」
話說五十多年前，M哥與P姐一同在中文大學就讀，P姐低一屆，但早早盯上師兄M哥，鎖定為追求對象，咁點出招呢？
當時M哥出身屋邨窮苦家庭，父母在批准佢入讀中文大學前，定下一項必須堅守條件——要自己養自己外，更要攞足夠家用返屋企。
M哥咬咬牙，好，去馬！一方面讀中大，一方面教夜校，更不時走堂去客串TVB節目（即係當年節目費唔慌高啦），忙到癲。如此，邊有時間上堂、做功課及準備考試？
P姐見到咁情況，就知有個靚位「入」嘞。主動獻身替M哥做功課及陪溫習，就此，令M哥大為感動，終能成功大學畢業，功勞超過一半是P姐的，怎不一生感恩？
其實當年M哥乃著名年輕才俊，靚仔又有學識，加上處身電視台，真真美女潮水般湧埋身，幾乎想追邊個都掂。
P姐又點睇？
「根本未驚過，因我提供畀M哥的情與愛及瞓身協助，冇人做到，正是——誰人能代替我地位？」
就此，M哥墮入P姐織下的情網，一網就網咗五十多年，至今從未想過破網而出，因為做「網中人」，極其安心快樂，拍戲之外，乜都唔使理，得閒釣吓魚、見吓朋友又一日。
我墮入情網，你卻在網外看……