曾智華
上兩次賽事，本欄貼士又再中規中矩，每次比三隻買W，前次中「比特星」六點二倍，上次更和味，「白鷺金剛」跑出，竟然有八點八倍，簡直超晒賠率，好分到唔多合理，當然，這正由於「小鳥天堂」熱到癲癲哋所賜！
過終點，「小鳥天堂」跑第六。賽事一完 ，我個心一沉，隱隱覺得，丁冠豪今次大鑊喇。因佢個倉只有一千零一隻高分馬，而賽前，丁廄畀馬主貼士，兩隻潘頓馬行頭，包括「文明福星」及「小鳥天堂」，顯示爆棚信心，結果……有人輸到瞓街了！
睇睇丁仔馬房，如今只得三十五匹馬，冚手新馬實力全未知乜料，揸住呢一手牌，弱過弱雞，點捱到季尾？
任何激烈競爭圈子，都冇乜感情可言，尤其馬主幾百萬元計買隻馬，再個個月7、8萬元養馬，不少心態，得就得，唔得就拉得。正因如此，丁廄才大量流失子彈。睇嚟，若短期內丁冠豪交不出三五場頭馬，咁就……
人的社會，一代新人換舊人，馬圈呢，當然是一代新馬換舊馬。
沈廄「浪漫勇士」退役而去，但新貴「包裝戰仕」真真得人驚。剛剛三班跑千六米，冇誇張，根本未跑過已贏一條街，極可能是下一匹馬王，難怪又畀「軟硬鞭」霸住。
今日「國慶盃」，出馬冷落，八匹跑一千米，睇格局，讓磅賽，不會最熱或最重磅的W。小弟認為三匹W機會較大，包括「翠紅」、「天天同樂」及「顏色之皇」。
「翠紅」有根有據，路程專家，明刀明槍試好閘。「天天同樂」應有得分，記住，巴度乃「讓磅級制賽之王」，買佢W補多三注P可也
至於「顏色之皇」，我慳返喇，潘頓贏得都唔慌好分，反而冷腳拖「玩笑」，入到第三都分到笑㗎！