跑咗幾個賽日，睇睇騎師榜，結果有正路、有唔正路。正路當然是「一哥」潘頓繼續任縱橫，掃下八場W，彈離領先。
唔正路為今季極多人睇好的周俊樂，仍然食零雞蛋，唔係冇坐騎，共二十四匹，但仍然冇W，遠離預期。
較為可喜是何澤堯慢慢恢復水準，排第二，只要莫雷拉唔返香港，咁，師傅方嘉柏實力坐騎就可較多彈畀佢，表現機會大增。
梁家俊素來騎功不俗，加上膽識過人，雖排第三，嚴格講好過何澤堯，因騎少七隻馬，但W數相同，今季有可能大放光芒。
當然，講後上，不可忽略艾兆禮及田泰安，好多練馬師用佢哋。
休戰一個星期，今晚再有得玩，跑足九場，希望投注額升返啲啦。出馬場場爆滿，小弟只集中度一場，正是第二場四班跑千二米。睇落，W只得三匹爭。
「路路勁」上鋪跑沙田一千米，擺明熱身，今次繼續由田泰安執韁出戰，上季尾同程曾入Q。雖然排八檔，麻麻，但會換來多一點賠率。此馬今年步入5歲，開始成熟，跑長一點較適合，若大家見佢出閘搶出，即有決心去馬，等收WPQ可也。
對手為潘頓肯再騎的「比特星」。上次牌仔黃寶妮騎，二十三倍，一睇賠率知唔去。結果渾渾噩噩，輸到甩轆跑包尾，唔多似真，賽績可以抹去，應該又係先熱身，然後交「軟硬鞭」出馬。
潘頓上季騎此馬四次，三次入Q，準到飛起，今晚肯再執韁，排五檔，以佢同賀賢合作紀錄，乃起筷訊號，估計將唔會熱到冇味，因上次輸得太肉酸。
第三匹要「馬馳登」，上鋪潘頓沙田千二入Q，突然唔騎，改配艾兆禮，絕對不可忽視，今季踏入5歲大熟，隨時可揭竿㗎。
以上三匹，頭馬必在其中。