由零開始，我就極怕去飲，因為⋯⋯真係講都冇人信，其實小弟是有社交恐懼症的。
好奇，站在台上對幾萬人講嘢，我半滴都唔驚，但要去到一個人海茫茫舉目無親的酒會，穿插在陌生人之中，立時渾身不自在，嚴重時有手足無措、全身發麻之感。
尤其嚴重為去飲，最怕與三九唔識七者同檯，交換卡片寒暄幾句之後，大家靜如深海（無謂亂歙講錯嘢）。
最慘，香港婚宴，永遠是七點入席，九點冇得食，大家必須齊齊睇片聽兒時故事，再由雙方父母輪流發言，你多謝我，我多謝你，終於搞到九點幾，才會有乳豬抬入場。逐道菜上呀上，十一點半仍未到炒飯、甜品，都咪話唔煎熬。
所以，小弟習慣去到婚宴，通常先放低人情，再與主人家影張相做紀錄，證明到過，然後就趁黑走人，若現場有老友，就一齊鬆，去邊？去搵間可以除掉領呔，豪豪氣氣大吃大喝的相熟店真食。
食飯，一定要搭子對、食物對、飲品對，才有樂趣。舉目無親婚宴最惡頂，尤怕被無謂人猛問傳媒八卦料。
嗱，我哋一屆草民係咁，你估啲高官、富豪又如何？哈，原來一模一樣，都係飲宴假食，消夜真食。
昨晚與一傳統大家族富二代A哥晚飯，此君毫無架子，兩杯到肚，豪情開放，幽默風趣。
基於N咁多公職在身，故不時要參加公務晚宴，遊走酒店宴會廳及會展中心大禮堂，與本地及外來政商權貴Social。
「碌Sir，呢類晚宴，真係食而不知其味㗎，又要依起棚牙客客氣氣，點會食得開心呢？所以，我習慣做完所有儀式，坐一陣，趁黑就閃，拉現場為食鬼老友去潮州舖，幾大整返碗翅做消夜，咁先似有食過嘢㗎嘛！」