曾智華
上周法庭又審一單的士司機與乘客衝突個案，最終的士司機無罪釋放。
平情而論，乘客要㷫到走去報警，警方查完後認為有Case，願意交律政司，而律政署研究過又肯去馬，決定起訴，咁當然係「有事發生過」。
但刑事案件入罪門檻好高，唔易Win㗎。
講到的士，小弟經常坐，故非常關注政府及業界搞到成身汗推出新政策——的士隊，幾個月過去了，究竟對整體的士服務，有冇帶來明顯正面影響呢？
其他乘客感受唔知，但以我個人經驗，答案只得一個字——冇！完全唔覺。在街截的士，上車後發覺十架有七架車廂清潔仍甚差，司機多數木口木面（部分甚至黑口黑面）阿伯，態度就算未到不友善，也多好似唔想撈咁款。
點解的士隊出現後，對整體服務改善好似冇乜效果，有請業界或運輸界高官，做個調查研究，再作公布。
昨晚又一谷鬼氣個案，小弟晚飯後，十點左右在尖沙咀截的士，上車後請司機阿叔駛去何文田，佢一粒聲都冇回應，就踩油開車。
沿途車廂靜似深海，接近目的地，我再要求：「麻煩你駛入停車場，唔該！」又如是，一粒聲都冇答。到埗，我慣性主動釋出善意，車資四十五元，畀夠五十元：「唔該晒，免找！」大佬，畀超過一成貼士，有冇一句多謝？冇！面容也冇變，仍是木口木面老奉（奉旨要畀貼士）咁款，吹脹！
上周《星島日報》財經頭條——小馬智行：正與政府溝通，逐步證明技術安全，港具備無人駕駛的士落地條件。
大潮流就是一切自動化，若反覆測試證實安全可行，咁真係的士乘客天大喜訊！上馬後小弟會搶先幫襯，希望從此坐的士再唔使睇人面色，坐車變受罪情況，從此消失。