曾智華
消費者委員會不時發表調查報告，多年下來，發覺部分有用，部分多鬼餘。
呢呢，本周初發表的有關超級市場調查，小弟就視為「多鬼餘調查」。
搞到身水身汗，唔知用咗幾多錢調查，結果發現幾大超市集團的「買一送一」及「加$1多1件」，其實是掩眼法，因先提高一倍價格，才變買一送一，其實得個桔。
喂喂，乜呢個係「天大發現」咩？當然唔係。麻煩消委會去訪問所有超市常客，例如三姑四婆五叔八公，肯定個個都會踢爆超市的先加再扮減手法。
常客個個巡超市，日日格價，用慣的所有商品，必早心中知價，你改到天花龍鳳都冇用，呃我唔到嘅。
例如我不時買的紅白酒、汽水、雞湯、鮮奶、豬肉、香蕉、煙三文魚、急凍水餃⋯⋯
老友，你想呃我，加完價扮買一送一，以為自己好醒？其實只是隻「豬頭炳」！
例如紅白酒及汽水，幾時真正減價呢？你可瞄準三個時機：一、所有汽水及酒都有循環減價期，酒的差價可能去到一倍，鎖死觀察三個月左右就知；二、如今超市，每兩個月就會做八八折，但只一天，若唔急，幾大呢日才出擊；三、大時大節，包括聖誕、新年及中秋，遇送禮高峰日子，超市紅白酒就會做八五折或八折，此時，你應盡掃，儲起慢慢歎；四、幾大超市輪流與信用卡掛鈎做宣傳，通常三個月內周末消費五百元，送五十元或四十元。若你心水清，夠耐性，分分鐘以上幾項可以一次過全中，咁就真係「精明眼」中的「精明眼」，入足貨可用半年。
總結，超市買嘢幾時平、有乜「陷阱」，使鬼消委會教咩，佢哋不如做其他商品，尤其新樓及銀行基金更好啦，內裏有好多蠱惑嘢可以踢爆㗎。