曾智華
香港是騙棍天堂，點解？因有大量人貪心，加上行資本主義制度，你一日未能證明提供「超筍回報」者犯法，就只有放行，睇住佢劏水魚，直至等到水魚真正被劏，見晒血，證實有人犯法，才可拉人告上法庭。
但日日有無數水魚被劏，這種罪案可能發生一千宗，才有一百宗報案。執法部門要蒐集到足夠證據，再交律政司評估勝算，有把握才起訴，至此，可能只得十宗，而再告得入，分分鐘剩下五宗。
意即一千宗劏水魚事件，能夠將騙徒繩之於法的，可能只有0.5%機會，這就解釋到，點解香港騙子如麻，反而暴力行劫唔多見了。
旅行團劏水魚同一套路，消費者人人皆知，參加旅行團，比自己訂酒店、機票、安排一切更平。點解？當然在其他地方賺返啦。主要是不停帶團友買買買，睇景點、食飯就嗱嗱臨，但去到購物目的地時，就畀足時間職員介紹、游說，搞到個個客唔買多少唔好意思。
一般講，香港旅遊集團手法比較文明，只營造客觀條件鼓勵你買，另外，購物點多數只需導遊帶客去，就按人頭回佣，運作頗為透明，絕少出到強逼購物。
但內地團唔同，根本收費低到離晒譜，點解？就是要趕水魚入籠，然後一重又一重經手者都過一過刀，自由經濟，「平到冇人信」不是罪，除非變刑事恐嚇或暴力。
十七年前惡名昭彰的女導遊阿珍，辱罵內地「賤價團」客，畀人拍晒片上晒網，最終也不是刑事，只是停牌半年，之後，又一條「好漢」，可以再帶團。
點解有「阿珍」出現？佢係雞定係蛋？又或是一個不良制度催生而出的樣辦導遊？其實答案早早寫在牆上。總結，只要有人貪，就會有「阿珍」，講完！