曾智華 精彩人生自己創
本欄經常指出，做生意如潮水，潮起潮落，乃正常現象，例如飲食業，傳媒天性報憂不報喜（Bad News Sells)，日日新開食肆甚少大鑼大鼓報道，但只要一間老字號結業，嘩嘩，即變新聞。
其實結業的老字號，小弟十之七八皆幫襯過，公道啲講——應該係時候執咗佢。
尤其中式酒樓，樓面大，衛生差，出品渣，服務喎，如此格局，你賣八蚊一籠點心都好難捱落去啦。反之，執咗佢，可能樓面一開十，畀有創意者細細哋博吓更好。
講到執，真係冇癮，居所附近靠背壟道，有間本來乜都有得賣的超市（燒臘、生果、蔬菜、豬肉、鮮魚、凍肉、雜貨⋯⋯），年多前睇住佢雄心勃勃，接咗三年前佳寶留下的吉舖，投資唔細，開張時有點聲勢，點知⋯⋯唉。
其實此舖位置甚靚，港鐵站出口，附近有幾期樂民新邨，另又有「半山壹號」豪宅群，即各類檔次客人都會有，數以萬計。而附近，完全冇對手，只有一間百佳，目標對象多少不同。更有利，成條街相當多錶位，汽車任泊。
做咗年幾，睇住佢慢慢陰乾，點解？
首先講燒臘，一開張就去幫襯，放入口，全部雪藏貨，燒功又差，注定冇回頭客。
呢條街街尾有間小小的燒臘店名「有樂」，一個紋身漢殺晒，門外不時有條龍仔，意即附近大把客，問題在你的出品得唔得？
燒臘先謝，跟住到海鮮河鮮，客流不足去貨慢，鮮魚變死魚，外判檔主好快投降。頂得最耐的豬肉及凍肉兩檔，也上月拜拜。
大大間超市，只剩下老闆自己做的生果蔬菜，唔執就奇。
市場現實，做咗年幾就釘，有緣有故，並非冇客，貨物也非貴價，但就由開張逼滿人變成拍烏蠅，唔使問點解。