文：娛樂組
梅啟明日前又高調開記者會，自詡「孝子」並宣稱要豪花150萬幫梅媽風光大葬，更信誓旦旦重申自梅艷芳離世後「冇用過阿妹一分一毫」，又踩被他拋棄的元配Joey冇資格做老婆。結果Joey忍無可忍，直接向《星島頭條》大爆料，更展示鐵證狠狠打臉！
元配Joey怒轟梅啟明：「係咪冇食藥呀？佢至少用咗50年，好似草蜢出道年份咁呀！佢從來冇做過一份固定嘅工作，只係做『全職兒子』！」Joey更獨家提供一張由梅媽簽署、抬頭寫梅啟明的4萬元支票，連同梅啟明開出的4萬元支票和8萬元欠單，鐵證如山！她指這只是冰山一角，追債上門是常態：「每次梅媽逆佢意思，梅啟明就會大發脾氣、要生要死，多次醉酒返家踢門，所以梅媽叫我帶我個仔返大馬，唔好嚇親細路，其實梅媽都係進退兩難！」
Joey更透露，梅啟明多年來對梅媽的財政瞭如指掌：「自從梅姐離世，信託基金每月會透過會計師樓call佢去攞梅媽張支票，直至母子反目為止。以前佢每到『出糧日』就爽快夾住梅媽飲完茶跟住去銀行入錢，晚上兩母子喺房密斟開『閉門會議』，唔係佢點知梅媽最後係拎到每月有25萬？」可惜梅啟明做生意樣樣爛尾，做劏房、由泰妹打理梅艷芳紀念館、開馬來西亞食品店，全部血本無歸。2004年就有債主上門收他「走佬」美國時的爛帳，每月分期還3萬，當時梅媽只有7萬；2005年推梅艷芳肖像手錶又大彈票；連尖沙咀舉行紀念梅艷芳齋宴和演唱會都損失超過百萬，全部要梅媽收拾殘局：「佢好錫個仔，好支持個仔做生意，但一『瀨嘢』阿媽就跳跳紮！後期更加入兩個泰妹呃阿媽錢，梅媽畀佢榨到乾淨利落。」除了榨乾家產，梅啟明更用梅媽的錢包二奶、三奶！Joey指他因為「斷糧」，曾被泰妹趕出門口，想去梅媽住的聖保祿醫院過夜。
竟要兒子停學打工
談到兒子Richard，Joey更是心痛，指梅啟明不理兩母子返大馬住劏房，竟叫兒子停學去打工，Joey怒罵：「x街邊個搞到阿仔咁呀？佢之前仲話我：『有冇理過個仔感受？』佢咁樣玩女人，提都冇提過個仔啦！仲呃梅媽話個仔要留港升學拎咗20幾萬，阿仔何來喺香港讀過書呀？」直到去年Joey向破產處投訴他隱瞞登台收入，梅啟明才肯每月轉帳3000蚊「封口」。Joey直言：「對質嗰幾千蚊生活費有失我老師身份，我係要畀佢知道做人唔好忘恩負義，當初佢落難，美國返港時我幫咗佢幾多呀！我哋兩母子住劏房，生活過得好慘，佢就風流快活有兩個情婦，仲開記者會請記者飲茶……」Joey更指梅啟明年前因「雞飯店跌倒官司」敗訴，欠下訟費要破產，質問：「一位已破產人士憑甚麼出入坐的士？請食飯甚至可以打官司呀？呼籲他尊重梅媽遺囑，切勿再搞事！」
