一如所料，粉嶺高爾夫球場「建屋官司」，政府再敗訴，上訴庭發還環評報告重新諮詢公眾。睇嚟又再有排搞，甚至政府會投降唔搞。
小弟由零開始已高調聲明，反對粉嶺高爾夫球場建公屋。大佬呀，任何人若去過嗰處，企草地體驗一下，必會覺得，邊個破壞球場都是「香港罪人」。
景觀美、古樹多，且布滿珍貴昆蟲及其他飛禽動物種類，置身其中，但覺心曠神怡，捨不得離去。如此一個球場，一塊土地，你摧毀佢，有乜淩駕性理由？誇張啲講，呢個球場，絕對是香港一項驕傲建設，提嚇拆都絕不應該！香港大把地，開發咗的僅三成左右，要起一萬幾千間屋，絕對冇問題，唔好呃鬼食豆腐話冇地！
不過，小弟堅決反對拆舊球場建公屋，不等於支持高球場繼續會籍特權化。
其實點解咁多人唔同情粉嶺高爾夫球會？主要原因是——我都冇份玩，為乜幫佢？
不單止冇份，在官司開打前（官司進行時，因要爭取民意，當然親民好商量，放你入去感受嚇貴族氣氛），你想入嚇去？難若登天！
我試過由朋友帶入去食午飯，都被旁邊的「尊貴會員」眼矋矋，目光正正表示——呢啲地方係你嚟嘅咩？你做咗會員？
總之，就覺得自己是異類，非常不自在。
點解會咁？因粉嶺高爾夫球會，由零開始就行貴族化，只有極少人有權入會（聽講排隊都以十年計），咪講平民百姓，就算香港有頭有面的中產，都唔使旨意做會員。
如此一塊本屬公眾的「特權地」，怎不令人眼紅，故才出現「拆咗佢」呼聲時，竟有咁多人支持。
世事不會無緣無故「搞成咁」的，若球場仍是特權化及貴族化，難保下一波「拆場」運動又再興起！