(曾智華)
昨日提及今期自己很享受的電影《廚師發辦》，意猶未盡，也有多少不忿，決定多寫一日。
院商點排新上畫的電影檔期，乃佢哋權力所在，冇得異議。事實，在商言商，理論上佢哋當然唯利是圖，認為收得的，除大量排影期外，好位的黃金時間，更會「萬佛朝宗」。
不過，問題在，院商的眼光，是否一定準呢？喂，好似唔係喎。例如放映到今天已經謝晒的《少林女足》，憑乜再霸住咁多影期，唔畀其他有潛質電影試吓？
講到呢度，當然又有不少Haters彈出：「你識乜呀？有冇做過生意啊？」對，我冇乜做過生意，但就見證不少認識及不認識的生意人睇錯市，蝕到叫阿媽。
講返電影排期，弱勢公司經常被恰，好片都分分鐘被撳瓜。舉個例，幾年前有部《緣路山旮旯》，上咗幾日，因冇牙力，排期特少兼天地場，差啲幾日就瓜得。
我有幸誤打誤撞入場欣賞到，一睇，喂，好唔公道啫，如此清新雋永有心思之作，若未點見光就蒸發咗，絕不公平，於是盡些微力量在個人社交平台大聲疾呼：「邊個睇完《緣路山旮旯》唔滿意，我私人回水！」
呢招亂噏竟然輾轉出現化學作用，引到不少人入場，跟住口碑轟傳，結果這部出色小品，最後獲得不俗票房及稱譽，總算爆咗個小冷門。
之後，我才知此片導演名黃浩然，有別具一格的思維，只可惜冇大公司做靠山，處於天然弱勢。嗱嗱，今次竟然又係佢，呢部《廚師發辦》，客觀評論，此片點可能一上就變天地場呀？
小弟拍心口，今次肯定院商有眼無珠走大雞！唔信，入場印證吓我的判斷！
我並非甚麼鋤強扶弱，只想觀眾有機會睇到用心又窩心的電影！