蹄聲漸近，馬季即將開鑼，各路正派（電視、電台、報章……）及邪派（外圍、騙子、做馬……）人馬，當然摩拳擦掌，準備開飯。
昨早步入茶記，但見班的士大哥已再冇興趣講侵侵點貪污及畀伊朗玩殘，講乜？當然開始講馬！
肥司機：「矮佬，呢輪我揸車周圍去，都見有個肥嘟嘟女馬神巴士廣告，嘩，好重錘啫。佢個廣告用晒馬會官方藍色，連個Logo都似八九成，我幾乎以為佢係馬會代言人，你有冇見到呀？」
矮司機：「當然有喇，佢仲著住件博士袍，斯斯文文，有啲權威咁款，肯定有人幫手做形象兼執過晒相啦。但睇真啲，喂，原來掠水嘢，肥嘟嘟叫你畀520元佢，上乜乜初體驗課呀。喂高佬，你賭咗幾十年馬，輸到甩咗好多條褲，有冇興趣跟女馬神學點贏錢呀？」
高司機：「矮佬，你快啲去驗腦啦，賭馬會贏？都儍嘅！馬未出閘已抽咗兩成行政費、博彩稅及善款。兼且幕後人在黑你在光，佢哋控制晒操練、餵料、藥物、點跑⋯⋯想贏？久不久符碌撞正一場就會，長線會贏？燒壞腦咩！其實無論乜乜物物股神、樓神、外匯神⋯⋯到如今的馬神，你加個棍字上去就差唔多。有必贏貼士，使拋頭露面賺學費？收埋自己食，已肥到著唔到襪啦。」
講開又講，如今乜都講AI，講大數據，小弟認識一位AI專家，八年前研發咗一套貼馬系統，包攬所有數據，騎練生日落齊，另加正路數據，綜合所有Data，每場貼四隻。
結果點？一如廣大馬迷——輸到瞓街！
點解？有人話，跑馬要掌握三種動物的心——練馬師、騎師及馬匹。更重要，同場十四匹馬跑，乜都可能發生，點測得到結果吖，正儍佬。