曾智華
成年人，理論上，下重大決定前，必定經過慎重思考，尤其涉及金錢。打工仔辛辛苦苦才儲到一百幾十萬元，需要用時，怎不再三考量？正常情況，越大銀碼越謹慎。
現實上係咪咁呢？哈哈，就小弟幾十年所見，完全唔係。反之，銀碼少少個個斤斤計較，格價格到牙血都標才出手。最佳例子，不少人為慳一個幾毫，行成條街再逐檔問，先會買斤菜或買條淡水魚。
早年移居美國及加拿大，也如是，幾乎所有人都會在周五、周六，非常勤奮地剪超市Coupon，因人人會周末去Shopping，揸住Coupon，可平一個幾毫。
當時我心諗：「喂喂，讀過經濟學ABC者皆知，先要走去買份報紙，再花大量時間搵Coupon，然後剪完揸車去用，究竟條數點計？完全冇邏輯及理性可言喎。唯一解釋，心裏受用，Feel Good是也。」
今日提及呢種心理，因上周五見到銀債開始認購，又係嘞，竟然有無數人揸住遠比可能分配到的現金衝去認購。
第一，其實有排都未截止，9月4日才到，為乜早早畀咁多錢銀行生息？佢會多謝你嗎？
第二，你估如今是美食展送鮑魚，霸頭位就搶到咩？唔係喎，我施施然9月3日才入飛，機會同你一樣喎，咁擒擒青為乜？
第三，你估第一日衝去大手認購，就會分多啲乎？又唔係喎，銀債採取循環分配，若最多每人十手，咁你掟一百萬元去申請，而我只用十萬元的話，大家都分配到十手，你有冇咁豬豬呀？
今次間間銀行都話，第一日已經破晒紀錄咁多人認購，若如此，肯定冇機會似上年咁，分到十七手嘞。我估應該十手左右，最多唔過十五手，若果用多過二十萬元去博，嘥氣！