曾智華
作為歌手，在過去幾十年，大多數人出道後最大心願，為能踏上紅磡體育館舞台開個人演唱會。點解？因這正代表自己的事業成就，已達到一個境界，此境界，只有很少同輩能達至。
時光飛逝，紅館已開幕四十三年，曾經有無數歌星在此登台。太多人能做到，越來越平常，當然無法滿足自覺是巨星者內心的渴求。
踏入2025年，任何巨星的夢想，已再不是紅館，而是在可坐五萬人的啟德體育場館開個唱。
哪個巨星能「食得住」咁大個場，乃一盤非常精密的計算。因若主角食唔住，如此，製作公司必蝕大本，對歌星的形象及自信，也會有嚴重打擊，好傷！
過去在此開騷的，嚴格講，都孭得起五萬個位。不講外國，單講香港，邊位巨星會是下一個敢試闖啟德主場館呢？
內幕消息，有一位本來想一試，但最後仍計唔掂數，故放棄計劃。邊個？正是許冠傑。
製作公司本來信心十足，因除Sell許冠傑五萬人大合唱外，更可Sell埋去年因《破．地獄》而大Hit的「文叔」許冠文。一個唱，一個講棟篤笑，加上以街坊價賣飛，人人負擔得起，冇理由唔爆。
咁點解最後放棄呢？正因啟德場館的超嚴格限制，加上地理位置問題，簡直是——趕絕長者。
需知阿Sam及「文哥」已年近80及80幾，意即佢哋歌迷粉絲大部分已70幾到90歲。
如此年紀，要佢哋冒日曬雨淋，熱天揮汗如雨，冬天寒風凜冽，必須落車行二十分鐘到場館，點頂呀？
更甚，唔准帶雨遮及枴杖入場，設計規矩者，完全冇為長者設想過，非常之不人道。如此不人道，幾萬長者又點入到場？
無奈地，許氏兄弟啟德演唱會夢難圓了。