曾智華
幾個麻甩佬飯局吹水，講吓講吓，講到坐飛機。
一致公認，如今坐飛機，若困在經濟艙，就等於困在空中監倉。尤其飛長途，簡直生不如死，捱足十幾小時後落機，三魂唔見七魄。
大家七嘴八舌不停懷舊，猛呻如今的空姐、飛機餐及座位，與上世紀完全冇得比。昔日搭飛機，未上機已經心情興奮，坐定定之後，座位又舒服，空姐又靚，飛機餐又好味，紅白酒更任飲。慘情，發展到今天？大家都有共同經歷，冇癮到爆，變成未上機已心存抗拒，因代表一段冇啖好食的痛苦旅程即將開始，若旁邊坐著核突佬或豪情大媽更死。
講講吓，阿A拋出一條問題：「各位，你哋坐咗幾十年飛機，有冇試過同時畀兩個美女夾住坐中間呢？」
全場B、C、D、E、F一齊回應：「冇喎，坐咗一百次都未試過一次喎，你試過？」
A：「你哋全部冇試過？咁就奇嘞，我多年經歷又一樣，難道美女唔坐飛機的？又或只坐頭等及商務艙？」
美女唔知點解冇，大家改而猛講有乜頂唔順者坐隔籬，又體味又鼻鼾又成日小便……都幾搞笑。
小弟真人真事，上世紀在美國夏威夷留學，放假坐飛機仔到其他小島玩。
夏威夷被美國佬侵佔後，為搞到班土著完全無心無力再反抗，使出絕招——你哋乜都唔使做，一切使費政府全包！包住包食包⋯…你哋開開心心過活啦！如此，夏威夷人就只快快樂樂地日日在公園唱吓歌跳吓舞，日日曬太陽歎啤酒燒嘢食。
日子有功，絕大部分人終於肥到彎唔到身，坐上飛機，根本無法攝入座椅，無奈地，身上肥肉部分瀉落隔籬。我就領過幾次嘢，真想問：「老友/姐姐，你啲肉可否執返回自己張櫈呢？唔該晒吓！」