曾智華
今日，小弟講霍啟剛，並冇用「明日之星」形容，反之直接用上「明日巨星」去形容，有如我買馬，只一注獨贏！
點解？簡單，你睇睇這位47歲的藍血人，過去十年的政治江湖走勢圖，就會領略，佢做硬巨星。
近日開始多人談論佢，因勢必「當選」成為馬會大董。馬會所謂選舉，絕對得啖笑。若未經協商而自己去選，肯定拉票拉到標晒牙血都會墮馬。你睇睇背景勁揪到身兼行政會議成員及鄉議局主席的劉業強，早幾年打晒開口牌去馬，結果？
總之，馬會是「私人會所」，選舉素來冇乜公平與透明度，一切形式是You scratch my back and I scratch yours，外人絕對潑水不入，冇得依牙鬆槓。
好嘞，點解今年霍啟剛以47歲的稚齡，竟有機會躋身馬會董事局呢？當然是「被大董」啦。
平情而論，在建制派陣營中，以霍啟剛的實力、背景、人緣及形象，絕對超班馬，非常罕有。我唔識佢，只多次聽及睇佢接受訪問，但覺有自然而出的親和力，尤其表達及解釋能力，更是芸芸立法會議員中，差不多最頂級的。
一個北京敬重人物（霍英東）的第三代，受英式教育，中英文俱佳，冇半點二世祖款，溫文有禮，毫無醜聞，老友，當今香港，真係唔易搵㗎，若你係北京、係特區政府，怎不錫晒而悉心栽培？
霍啟剛如今已是立法會議員、香港藝術發展局主席、人大代表……再下來，必定再被安排坐上多個公職主席位，加以磨練。
睇嚟十年八年後，也可能成為馬會最年輕主席。另外若國家有需要，霍仔也可能要「被做官」，由局長開始培訓，然後上呀上。
結論，明日巨星位，走唔甩㗎嘞。