黃秉華
話說，一位在成都開眼鏡舖的90後小老闆，某日忽發奇想，感覺自己有一身才學，可以成為偉大的動畫家，結果夢想成真。
「你講《少林足球》呀？」無錯！記唔記得有句精彩對白是這樣講——我豬肉佬何嘗唔係想做一個偉大嘅舞蹈家？現實故事是小老闆從小愛讀神話和歷史劇，內容看得多了，腦海滿是繪聲繪影畫面，能夠「吐」出來，變成動漫場景，豈不快哉，但自問「我沒有繪畫功底，本職只是開眼鏡店，腦子有再多想法，也只能想想而已。」
朋友，你生得逢時，生於國產AI新時代，你想得出，就有AI系統幫你做得到。「咁都得？」梗係得，小老闆公餘學習AI短視頻，扚起心肝做出一套《雲上仙宮》AI大製作，據悉，過程容易不複雜，「先用出圖軟件做好提示詞，再導入國產AI軟體完成視頻生成」，每條視頻創作要花5粒鐘，AI成本30到40元「人仔」，如果反覆調整和修改，要百元或以上，高清製作成本就至少500大元。皇天不負有心人，央視為他報道，外交部新聞司司長毛寧也在社交平台分享此作品，這條34秒的AI視頻，不足四日在海外突破500萬播放。
「嘩，真係熱情奔放，創意無限，燃點起全民投入人工智能的一團火。」我感覺到呢個Moment，中國AI要爆啦！「幾時睇《功夫女足》呀？」我唔得閒住，我要試用AI製作《新少林足球》。「乜唔係《新大話西遊》咩，你咁鍾意西遊……」講呢啲，我認真的呀！