曾智華
人人都講過——室雅何須大，說起來，我一邊欣賞《誘人飯聚》，腦海就彈出一句——精彩電影何須投資大？
今期上的兩套電影，若你認為對周星馳的《功夫女足》無法有感覺，因已難再被小學生級笑料吸引，咁，一於去睇《誘人飯聚》啦。
歐美影評界，甚多尖酸刻薄之輩（要突出自己與眾不同的視野），但奇，呢套《誘》，竟幾乎獲百分百影評人推薦，罕見地獲爛番茄（Rotten Tomatos）96%好評，真的是絕對絕對不簡單。
一套電影，只發生在一間屋內，僅得四位演員由頭踩到尾，客觀條件如此，要留住觀眾全程專注，由劇本到導演到演員，真真少啲功力都唔掂。
睇完才知，原來此片由監製到導演到主角都係佢——奧莉菲亞懷特，才華之高，冇得唔服。
劇情講述一對已經再冇激情的夫婦，日日困在家中鬥嘴（中外老夫老妻皆如是？），針鋒相對多，溫馨暖語少（甚至冇），這種關係，女導演懷特極之清楚，也深有感受，因佢早早經歷由熱戀到結婚再到離婚的心路歷程。
這對夫婦是否真的冷若冰霜？不是，反之，在各自的內心深處，仍有不少對性的幻想，甚至越界的衝動，仿似一隻被困在籠中的猛獸，只待有人解鎖，即會一衝而出。
誰來解鎖？正是一對住在樓上，晚晚做愛叫床聲搞到擾人清夢的豪放情侶。
陰差陽錯，兩對Couple相約飯局，就在酒精與大麻的影響下，「猛獸」突然被解鎖，慾火慢慢狂燃，勢將一發不可收拾。
結果又如何？呢套戲，我一邊睇，一邊同自己講，只有女導演才可拍得咁敏感與細膩，劇終一查，果然是，說故事高手也。