黃秉華

你敢相信嗎？深圳團隊已於2025年初，研發出一台EUV光刻機原型機，目前尚在試用測試階段，不過，路透社爆料稱，2030年中國將可實現晶片自主生產。過往，科技界眾口一詞聲稱，在西方集團圍堵之下，國產晶片進程已經戛然煞停，中國需要從頭再來，行多幾年冤枉路。

荷蘭光刻機公司艾司摩爾（ASML）CEO早前跟傳媒分享經驗，陰陰嘴咁笑，大致如是說︰「中國總有一日自主生產晶片，咁咪放長雙眼等呢一日囉，不過，晶片比賽如龜兔賽跑，追落後真係好困難，代差問題尤其是死結。」言下之意，美西方科技集團「阻頭阻勢」這一招見效！

路透社發掘得到的真相，令荷蘭人好尷尬，原來中國這台能生產「極紫外光」即EUV的光刻機，是深圳出重金禮聘ASML的前工程師團隊打造；這又如何，「唔得咩，差人拉㗎？」

科普一下，EUV光刻機是「利用極紫外光束，在矽晶圓上刻劃出比頭髮細數千倍的電路，電路越小，晶片運算能力越強。」如今荷蘭外援出手，中國掌握極紫外光技術、自主生產高階晶片，無難度。

話時話，英國技術人員斯萊特，十八世紀秘密把紡紗機設計藍圖和核心技術帶到美國，1789年與親細佬成立紡紗廠，分工合作，為美國解決英國壟斷紡織技術問題，被譽為「美國工業革命之父」。

你知否，英國當局是嚴防「紡織叛徒」，如果拉到的話，要「度頸」㗎，唔係差人拉咁簡單，唔係講笑的。