曾智華
成日有人問我：「碌Sir，你搞乜咁好精力㗎？人退休你退休，仍百足咁多爪，寫咁多嘢，又搞N咁多活動，不斷變身，一陣講財經，一陣講馬，一陣講電影，一陣講旅遊，加埋飲飲食食，你究竟乜嘢構造㗎？」
我點知喎，只知天生如此，由童年到老年，精力旺爆錶，不能也不想停下來。
記得當年讀大學，同房者乃書生一名，愛靜，但我則日日搞搞震嘈嘈閉，終於佢頂我唔順申請調房，因要追求安寧。
其實退休後我時間更多，早上五點幾起床，若唔猛搞嘢，點捱到晚上十點瞓覺？
講吓笑，幸而小弟犯罪活動無興趣，否則變咗黑幫頭子都似！
近幾年無心插柳之下，竟然成為「食家」（其實是為食），食遍港九，慢慢跟不少有心有力有火的經營者及大廚結為好友，於是經常食到驚喜的菜式。
真誠結交到飲食業朋友，因小弟有幾項堅持：一、次次畀足錢；二、食著渣的唔柴台（反正佢都會執笠）；三、有潛質而要改善的，靜雞雞提意見；四、發覺好的，再幫襯，若肯定真好，就在傳媒中推薦，然後少則十多二十人，多則百多二百人操去欣賞。
就此，與我一齊食的，不時食到舐舐脷。
時間有功，一個「為食鬼團」慢慢成形，如今已有二百幾人，每星期猛鬼出動，默默成為飲食業一支大補針。小弟衷心希望能為出色食肆帶來細胞分裂效應，我帶十人，若十位滿意又開心，就個個再帶十人，變一百，一百再變一千，然後……
香港飲食業是否冇得做？你估真係個個北上咩？正常日子仍有六百幾萬人搵食，若你的出品、服務及氣氛好，起碼有三幾千熟客啦。「為食鬼團」替你開關，其他靠自己喇。