黃秉華
聽聞美國打伊朗打到「彈盡炮絕」，如果不是路透社獨家爆料，我以為是「認知作戰」，有人散播不利特朗普的Fake News。
中環萬事通又擺出老師咁款，問︰「你知道甚麼叫范弗里特彈藥量？」韓戰期間，美國主帥范弗里特主張打仗不受彈藥限制，有幾多傾瀉幾多，只要實施密集火力壓制，便可有效減少步兵傷亡。「老師，都AI年代了，你仲丟書包？有乜唔識問豆包啦。」
美國邊有可能缺少彈藥，「係唔係白宮以退為進，故意放出煙霧呢？」有道理，美以伊三國，最想「導彈再飛一會兒」係以色列，白宮唯有報窮，咁，咪得囉，大家都知道特朗普不單只識趁勢，個人又好有智慧，吓哇！
明白，萬事通最叻分析股市走勢，佢話下半年應該暫時以和為貴，平息干戈，點解？中期選舉需要有唞氣位，唔好去得太盡，美國經濟需要光明亮麗，華爾街不能冇表現，如是者，「你話我話嘅，A股與港股必然受惠，呢一輪升浪有睇頭，大家要把握大好形勢。」
白宮稱美國擁有「遠多於世界上任何國家的彈藥」，街外消息稱︰「美國正以創紀錄水準生產重型地面武器炮彈。」 不過，也有認為美國彈藥供應量可能低於持久戰所需數量。「換句話講，美國今時今日打仗，范弗里特主張不合用，慳啲使，方為大將軍。」
「美國下一站係無人機當先鋒，你睇烏克蘭、伊朗用無人機用到出神入化……」老師，有冇無人機冧把介紹吓呀？