曾智華
周三晚，手機訊息又再轟傳名人死訊（點解係再？因近兩月特別多演藝圈名人辭世），今次乃鬼馬填詞大師黎彼得。
個個問：「點解今年特別多演藝人逝世？」情況並非反常，人一踏入70歲，就進入Bye Bye Zone，隨時因任何理由拜拜。近兩年多人拜拜，因香港人口越來越多70歲以上長者，情況正常。
反而唔正常係，周三晚上大家奔走相告，但周四早上，各大報章娛樂版全無這段新聞（我睇的幾份暢銷報紙，包括本報），以黎彼得在廣東歌樂壇的貢獻，冇理由唔報道喎！不過，昨日突變全部頭條報道。
報章雖然唔搶先報道，但網上大把，引起洶湧談論，我的傳媒演藝圈老友，一致覺得香港樂壇以至整個香港，欠咗對黎彼得的一份尊重及謝意。
點解？因在上世紀七十年代，老黎作品為香港帶來無盡生氣。佢以幽默、生動、鬼馬、到肉、抵死⋯⋯的用詞，填出多首經典作品，這種「草根通俗」味，其他大師級人馬絕難寫出，因黎彼得出身基層，曾經歷市井生活，故能將廣東俗語入歌，例如：濕滯、移燈換櫈、走糴壞腸胃、亂嚟吠、夠薑、吹脹……
如此低俗歌詞，一放入當年香港大學天之驕子、靚仔到爆的許冠傑口中，有奇妙化學作用，立即紅遍香港，至今小弟的「中坑老坑音樂聚」，仍唔唱唔舒服。
老黎能力絕不止於填「俗歌」，充滿哲理的《浪子心聲》，也同樣出自佢手筆。
沒有黎彼得，就沒有許冠傑在七十年代的大紅特紅，也沒有《Monica》，張國榮憑此曲彈起，勢頭直逼八十年代獨霸樂壇的譚詠麟。
總結，香港樂壇，以至整個香港，都欠黎彼得一份公開的欣賞及尊重，佢，絕對應該得到更多更多。