好多人話香港已經冇乜生意好做，錯！只要多觀察，多動腦筋，就會發覺處處商機。
其中之一，開辦中產至富豪級的退休中心。
香港人口急速高齡化，60歲以上行得又走得的，二百多萬，全部好快過70歲。小弟身邊老友，不少70開外，身體退化加快外，最弊子女大部分已移民海外，點算好？
最理想是有班志同道合老友，齊齊入住一間設備優良，乜都有齊又唔使煩（洗衫、煮飯、清潔、維修、按時要交乜費物費⋯⋯）的酒店式快樂中心。
香港最著名的當然是北角雋悅，初初開時拍曬烏蠅，搵小弟度「橋」搞旺佢。我一把脈，即指出拍烏蠅原因：一、要求先付一大筆錢。雖話入住一世，但冇講明有乜費用跟尾，例如，各式額外收費（管理、維修、差餉、租用設施……等），如此就令人擔心入住後需面對收費黑洞，故唔敢試。二、到底是一個新中心，若試都冇得試，就畀大筆錢入住，咁⋯⋯唔適應或後悔點搞？
於是小弟膽粗粗提議：一、一個價全包，不再有其他收費，令入住者有數計，安心！二、可先租試住，滿意後再買長住權。
結果不久之後，房協高層真的實行以上兩點，立時轉勢，加上口碑及名人紛紛入住（李怡、岑逸飛、許鞍華⋯⋯），好快已變僧多粥少，後來者要排隊。
前幾日去會所晚飯，遠遠見到前高官「眾人媽打」李麗娟，好開心話：「智華，我日日睇《星島日報》㗎，你寫多啲有趣嘢啦！」
鏡頭一轉，原來與佢同席，正是另一退休局長「D姐」俞宗怡。嘩，好Yeah啫，將銀髮加染彩色，證明心態青春。
呢處另有「AO大佬」陳祖澤入住，個個快快樂樂。咦，我幾時都有份呢？