(曾智華)
小弟年輕的時代，無論在街頭又或在職場，經常聽見一句揶揄人的粗俗形容：「丁友都未見過大蛇屙尿（核突但直接）。」
意思簡單——丁友見識少，未見過大場面！
放在股票市場中，每二十、三十年就會有大批「未見過大蛇」的散戶或貪心小投資者中招，落入「奸的叻人」布局中。
有返咁上下年紀的香港人，若長年參與投資，一定會越交越少「學費」（蝕錢），因知道金融世界滿布險惡，老千如麻的盜匪如毛。
但股市、樓市升起上來，的確可以令人發癲，失去分析能力，不單亂瞓身，更會借錢去「博發達」。
結果會點？香港1973年大股災，屍橫遍野，恒指由千七點變百幾點。1996年全人類又以為樓市只升冇趺，連公務員都玩「騎樓」（一人炒幾個單位），利用身份狂借貸。二千年科網股又一鑊，2008年再發生金融海嘯。每次皆有「神秘力量」，將個市先炒高到你神暈顛倒失理性，覺得唔瞓身就笨豬。
過去年多，這現象正正發生在韓國，一升幾千點，股市仿似冇地心吸力，再冷靜的人，也難抵受其誘惑。因見到身邊人個個唔使做，就可以日日開香檳（當年香港魚翅撈飯、XO當水飲的日子，我都見過）。
於是，慢慢變全民入市，不少用槓桿插入去，因「賺硬」！
結果嘭的一聲，一日鋤過千點，跌停板。6月22日創出歷史高位9,385點後，只一個多月，撻到五千幾點。
但老江湖皆知，要一網成擒，冇咁易玩完，多先來個似樣反彈，吸引更多水魚以為跌完，加碼入市，然後才……1997年香港千七點變百多點的「大蛇屙尿」，會否在韓國重演呢？韓國可有真正「專家」喝得住班水魚！