黃秉華
科技發達煩惱越多，但不能見到問題就要因循復古。話說教育界發覺越來越多學生考試和做作業，都曉得利用人工智能幫助，有老師直斥這是作弊，唉，唔好睇唔順眼就難為學生啦，拜託！
AI發展普及，很多學問和知識從此得到更大效益，你不需要讀過、背過之後，才可做學問工夫。識得問問題，曉得搵資料，能夠融會貫通即可，AI咁方便都唔畀學生善用，呢啲叫迂腐！恕我個性係咁直，我有合理懷疑教育中人死抱傳統，目的是老師以不變應萬變。一句話，老師，其實你懶啊。
AI禁止論的主張來自美國，當地大學教師提議，重新用古希臘考試方式——口試來考核學生。邊有走返轉頭的啊？學生識得活用AI，不要阻止啊。復古？學生用「臘肉」交學費（孔子門下的規矩，大家唔好笑），你收唔收貨先？
科技是節省勞動力，提升生產力的工具。舉一例可明白︰李敖是歷史學家，他曾為文讚美影印機，點解？互聯網面世之前，影印機節省搵資料的時間，以及加快完成論文。李敖記憶力驚人，不過，也不是可以做到背得出成套《永樂大典》吓哇！李敖係叻人兼有財力，老早私人購入一部印影機自用，你話幾方便呢。一理通，百理明，用影印機幫手做的學問也是學問，同理，用AI幫手做作業和考試，有乜唔可以？改變考試方式便OK囉。
好在我唔係學生，唔係嘅話，我一定會利用社交平台，鬧爆拒絕科技進步的人。火都嚟呀！
