曾智華
聖誕前跑馬，傳統上有所謂火雞馬，這個與乜乜騎練生日有馬贏的講法一樣，早畀已逝世的牙擦練馬師踢爆：「多餘，贏得就贏，邊會等生日或食乜火雞㗎？真戇居！」
練馬師部署雖各有不同，但總之講，仍是按馬進度安排出擊，鬼理食唔食火雞。
今晚練馬師報名，只有一個練馬師場場有正選，羅富全是也。咁擺陣，絕不應隻隻出嚟減分咁無聊啩？故此，今日集中研究佢旗下馬機會。
一、最勁當然是「至尊瑰寶」，英國自購馬，如今只是3歲，上季尾一開始成熟，先執一W；踏入今季，更勁，出三場已兩W一Q。練馬師立即安排增程，由千二米加到一六五○米，睇嚟仍是冇W有P格，纜躉！
二、「發財先鋒」。呢隻馬比較奇，已經8歲，照理應早早退役。冇退，即幕後肯定佢仍有出頭機會，雖則已三季未W過。「發財先鋒」乃長途氣袋，最當打時可以跑一級賽，亦曾W三級賽，卡士極高，爛船也應有三斤釘。
如今由117分減到63分，回跑初出道時經常有表現的快活谷，練馬師不似是安排繼續減分。10月26日此駒博過一次，入P，即仍有戰鬥力，W、P小注一試。
三、新馬「勝在當下」，出賽兩場，上次跑快活谷千二米開始有嘢睇，跑第四，今次可進一步。
四、「駿馬之寶」今季出四場，兩入Q，已經試準，隨時起筷，贏取第一W。
五、「活力精神」今季轉5歲，開始成熟，睇走勢，或未必能W，但入P則要預埋佢啦。
羅廄今次出九隻，上述五隻最似樣。「至尊瑰寶」、「駿馬之寶」WP二串三。
其他三隻少少哋玩位置過關，尤其金睛火眼睇住「發財先鋒」點跑，可能有發現！
