曾智華
由細到大，再到老，我都無法明白，為乜人去後，要搞瞻仰遺容。
大佬呀，人人都想將自己最美一面遺留在世上，尤其在所愛的親人、朋友及粉絲心中，呢個應該是「阿媽係女人」道理。若如此，為乜我去後，你班友竟在我無力反抗時，大鑼大鼓將小弟個「死樣」畀人排隊睇呢？有乜需要？有乜邏輯？
簡單舉例，英明神武如李小龍，當然只想遺留如《唐山大兄》、《猛龍過江》及《死亡遊戲》個勁爆玻璃形象給後世紀念。喂，若你不停刊登佢瞓在棺材內的樣子……咁，都幾肯定，李小龍在天之靈會用「李三腳」踢到你飛起！
其實，現代社會，越來越多人生前指定去後點搞拜拜儀式，拒絕繁文縟節外，更要免去喊苦喊忽的「靈堂大龍鳳」。老友中，不少更指定唔准搞瞻仰遺容。
名人以倪匡及蔡瀾最決絕又瀟灑，話明唔搞喪禮，更不會公開自己在哪個日子時辰離世，總之，消失咗就消失咗，火化完才公布消息，乾手淨腳，旁人不得多多事實依牙鬆槓麻煩人。
現代世界，有書本、有相片、有影音，你想回憶任何一個朋友，易，佢生前與你聚會時都必拍下照片啦。那種場合，多舉杯暢飲，呢種氣氛下的樣貌，最是開心又美麗。
所以，要憶故人，睇返以前齊齊快快樂樂的黃金照片就好了，何須走去瞻仰遺容？
長Sell英俊有型的謝賢，肯定只想留下型到爆的形象在觀眾腦海。呢點，佢個仔謝霆鋒絕對百分之一千心領神會。因霆鋒就是青年版的謝賢，身體語言與Chok樣，幾乎一樣。因此，當然知道先父的遺願，正是——My Show Must Go On！
故做完簡單送別之禮後，立即回國開騷！