曾智華
傳媒生涯最好玩之處，為似有張Pass，乜人都可以接觸到，包括紅黃藍白黑人物，以至高官富豪地踎……當中，也包括逢選必勝的前議員。
諗起佢哋，因剛剛見到天星小輪向政府申請兩條航線加價。
呢段消息只登在「報紙屁股」，因根本冇乜人關心，編輯當然不大做。
時光倒流三十多年，當時香港議會選舉非常激烈，為爭議席，政客當然無所不用其極。識玩的幾位，逢選必勝，永遠高票，點解？簡單，總之草根選民要乜，佢就爭取，不理黑白。
與一位前「必勝議員」晚飯，兩杯到肚，攤開嚟講：「碌Sir，其實民主社會選舉，無論西方世界以至亞洲各國，想贏好易，只要你瞓身支持福利政策，全攻型討好最大公約數的基層選民，必勝！尤其在香港，反對派永遠冇得執政，故可以開天殺價，去得幾盡就幾盡，畀人感覺無懼富豪與強權，會贏好多票㗎！」
A君（不便公開是男是女）策略，正是「逢加必反」！任何政府及公共機構收費，加一個仙都高調反對，議會內鬧到飛起，議會外組織示威，尤其針對人人要用的電力及交通工具，明刀明槍誓死反對加價！
負面人性之中，有種叫「見利忘理」，只要我有著數，就話之你有冇道理。
政客將大機構及富豪一律標籤成——為富不仁，強權壓榨，懶理市民生活水深火熱。
至於政府，則必定是「官商勾結」，偏幫大地產商炒高樓價，賺個肥到著唔到襪。
A君呢招，當年真係掂過碌蔗，橫掃政壇。不過，如今冇呢支歌仔唱，因香港已經「由治入興」，開展另一種政治生態。
天星申請加價，你估再有冇議員「仗義執言」呢？抑或太細眉細眼，講都無謂？