曾智華
一間食肆成功與否，重中之重，一定是靈魂人物——大廚。因就算你間大寶號裝修幾輝煌，服務幾超卓，氣氛幾優雅，如出品唔得，必定拍烏蠅。
但一個出色大廚，肯定N咁多人想挖角，呢下，作為老闆的，最為頭痛。因人之為人，就有人性，而人性之中，有兩大負面，一為貪，二為囂。
個個老闆想揚名，但當餐館攞到米芝蓮一類榮譽，咁，東主就頭大喇。起初必定其門如市，收入激增，然後N咁多人游說大廚跳槽，正常人性，大廚必會信心爆棚囂張起來，開始跳草裙舞，要求加薪。加幾多，視乎外邊挖角者出手。
更弊，廚房講「大佬制」，一係唔跳槽，一跳就全棚馬一齊走，搞到廚房真空。所以，投資飲食，若你冇自己飲食業內班底，又話自己唔識埋鑊，咁就肯定會畀人「玩」及「詐型」。
再者，若東主重金留人的話，大廚必會要求多多，最後要求獨攬採購權。
飲食行頭內，回佣乃非常普遍的「惡習」，邊個揸權決定買乜及去邊間買，就自然會有人埋身提供回佣。若不太離譜，一般東主都會隻眼開隻眼閉，以大局為重，但仍要畀買手知——老友，我知你有食水，但勿太深呀！
只是老闆與打工的，永遠在扯大纜，若實力平均，咁就冇乜邊方贏晒或輸晒。不過，一旦靈魂大廚過分囂張，就會慢慢覺得自己是天之驕子，若再擁採購權，基於人類貪的天性，必定食到盡。
這個現象，早前就在一名店發生，結果東主頂唔順，斬纜炒大廚，寧願搵三線人馬頂住先。
大廚呢？玩出火，有名氣，當然有老闆，但新場哪有舊場的客源？開頭兩個月拍晒烏蠅，信心盡失，水準下跌，下回如何，看分解了。