借林雪金句︰今次真係返唔到轉頭。點解嘅？好用囉，就係咁簡單，你唔好諗過隔籬。唔單止好用，仲要價廉，所以國際流行「中國擠壓」（China Squeeze）的新概念，指中國強大的製造業能力，正在「衝擊」西方發達國家，並「擠佔」了全球南方國家的工業化發展空間。
「幾時美國變成南方國家？」何以有此一問？原來日本傳媒報道，美國企業正在廣泛使用中國人工智能，部分國產AI模型使用費僅為美國高性能AI的1%左右，如是者，矽谷無人同你講「愛祖國，用國貨」，除非你堅持環保，放棄使用AI，又作別論。
話時話，只要你用過AI之後，相信無可能返轉頭，不過，特朗普見到勢頭不對，隨時向中國AI下手，加稅又得，禁國民使用都可以，事實上，1:99的費用差距，簡直係離譜到可以報警求助。
資料顯示，美國企業每周改換中國AI，今年以來從30%的佔比，一路升到逼近50%，如是者，危及美國經濟，你知華爾街科技「七姊妹」擔起成頭家，有咩依郁，美國變成日本，迷失三十年都似。
美國點會係南方國家？矽谷等同銀河系，馬斯克都就快搞得成「火星移民」，中國火箭才剛剛實現回收，兩個超級大國很有差異。「即係咁，美國製造就是美國製造……」老友，問你一句，美國AI好用啲嗎？
世界只有「美國擠壓」，中國推出平靚正技術產品，例必「捱打」，華為5G、TikTok是好例子，實情係美國「好打得」就夠，其餘免談。