本欄馬友應該記得，小弟在5月初，手多多寫咗篇——一於玩「平頭馬王」。
當時只是口噏噏當秘笈，豈料馬會嚟真，上周五公布香港賽馬史上大突破消息，「嘉應高昇」及「浪漫勇士」破天荒榮膺雙馬王。
晚會現場掌聲如雷，顯示深得民心，實在，兩匹硬要選一匹，點都有點遺憾。
不過，歡呼聲之後，跟住有噓聲四起，來自邊處？來自公眾棚，即應該有機會投票選馬王的選民，頗有不是味兒感覺。點解？選馬王最理想是公眾一人一票，若如此，出現同票的機會微乎其微，接近不可能！
跑馬，經常有Dead Heat不分勝負，凡此情況，馬會為顯公正公平，必將平頭相放大再放大向公眾展示。今次選馬王，既然馬會話Dead Heat，咁，又能否將投票數字全面公開，以免被指造馬咁尷尬呢？
其實全世界的選舉，由政治到金像獎，再到樂壇每年的金曲獎，皆不會百分百在陽光之下，以透明方式運作。真實個案，上世紀八十年代，譚詠麟紅透半邊天，受歡迎程度遠遠彈離其他歌手。其時，個個電子傳媒都搞金曲獎，若真真正正由公眾一人一票選，立即冇得搞，因阿倫掃晒。老友，一人獨霸樂壇，其他歌星企喺邊？邊個會出席？樂壇點發展？
因此，各個機構都度出個專業評審小組去平衡樂壇失衡現象，由此，林子祥、張國榮、梅艷芳、張學友……才有機會相繼冒起。選馬王，下年可否先由公眾投票，再加「專業平衡」？
今晚快活谷最後一戰，雷神理應贏馬留下美好回憶。最有意思當然能W「勝利君子」啦，好形象嘛，但講實力，最強仍是「葳莉非凡」，上次在泥地「假輸」，今次見真章！