曾智華
近幾年，所有傳媒報道飲食業新聞，幾乎是一致的——冇得做，執笠潮湧！
係真唔係真？個人親身所見，答案——Yes and No！Yes是的確好多舖執，尤其樓面大、員工多、出品老化的酒樓，通常食品是預製，員工黑口黑面，洗手間衛生不佳……呢類收費點便宜都難捱得住。
但輕裝上陣的新派小店、廚功出色的私房菜，又或提供鑊氣小炒、煲仔飯，以及粥粉麵飯街坊店，只要水準高、收費合理（唔等於平），在今天仍絕對有得做。
讓我舉個最新實例。
土瓜灣馬頭圍道及江蘇街交界有間小舖，過去三十年，我睇住佢變化。舖面不大，只二、三百呎，左邊是開放廚房，右邊是堂食樓面，只可容納逼逼貢坐十六人。
早年由一對樸實夫婦及女兒經營，主打北京水餃。妻子日日包呀包，丈夫負責煮呀煮，女兒則主理樓面清潔，相當多熟客。
日漸一日，夫婦老了退休，女兒提早一個月通知：「碌Sir，我哋唔做喇。」
之後，舖位吉咗一年，才由一對新移民夫婦接手，經營山東刀削麵，明顯未能針對市場需要，年多結業。
兩個月前，內裏略略裝修，由一間叫「榮盛」的牛腩牛雜麵店接手，我多次行過，見兩位斯文太太做樓面，明顯不似打工，炮製牛腩牛雜的，則是一位大叔。香港人對牛腩麵，真有永恆不變的鍾情，好的根本唔憂做。見證在這間「榮盛」，新開已客似雲來嚐試，結果兩個月仍勁旺，即不少新客已變熟客。有了市場印證，小弟在一個黃雨下午拉老婆大人一試，果然掂。目測每位客人消費平均五十至五十五元，繁忙時間每十五分鐘翻次枱，開朝十一晚十一，你若識計數，應知每日生意額有幾可觀！