曾智華
近月不時有曾經常去的食肆負責人來電求救：「碌Sir，唔該快啲帶你的為食老友來支持吓啦，我哋好唔掂啊！」
點解佢哋係「曾經」常去？說穿了，正正是我早前提及餐館成功的要素，佢哋無法維持。再重溫：
一、地方及氣氛，能否令客人食得舒服？（有幾間死在太嘈吵及客人質素不佳，粗口橫飛。）
二、菜式出品能否維持中高水準？（不少菜館會畀三級出品生客食，於是好難養熟客。）
三、侍應服務不專業。（香港人個個心照，不會要求太高，但也不可離譜。）
四、收費是否合理？（客人個個心裏有數，懂食的客人，不會要求抵食，但一分錢要畀足一分貨。）
至於第五項，不少餐廳死在完全唔合格的洗手間，欠缺乾淨衛生，沒有專人經常處理，兼且設計毫不尊重客人私隱。
有間名店，我已經很少去（希望不會再去啦），正是洗手間異味甚濃烈，向經理反映，佢答：「此乃大廈的屎渠問題，成日塞，好惡搞！」
經理可能真的無奈，但作為客人，為乜要品嚐美食中途走去「歎」惡心氣味呢？
講返香港飲食業生意，有一類食肆情況的確嚴峻，正是唔上唔落，晚餐消費由二百元至五百元的那層卡士食肆。
做最平生意的，食客對食物、環境及服務質素，不會有要求，填飽肚就走，故此，生存不會有太大困難。
中高消費的場所，就我所知所體驗，只要符合上述五大條件而優秀的，全部冇問題。反之，有不少唔訂無位，甚至誇張到要預訂三個月至半年。
最弊是唔上唔落的，五大要求全部只做到五十分，出品、服務普通而收費不低，對象客人同樣消費可以北上做皇帝，呢類最傷。