MC張天賦前晚在紅館展開一連五場《E=MC2演唱會2026》，四面台全場爆滿，首場邀得圈中好友陳蕾、Billy Choi及Novel Fergus擔任嘉賓，陳蕾更大爆初認識MC時的印象是會撩姐姐的「輕浮死𡃁仔」，MC亦自爆從小頑皮又經常和媽媽吵架，近年留意到媽媽年歲漸長，每次跟媽媽道別，他都攬攬、錫錫對方，並鼓勵粉絲多擁抱媽媽。文：莫匡堯 圖：朱偉彥
開場時MC已連環跳勁舞，結果他臨時加插說話位，笑言要唞順條氣，「本來冇咁多talk位，早兩日發現跳完三首歌回唔到氣，所以講吓嘢拖延時間！」他又鬼馬地宣布不會除衫：「雖然我最近瘦咗，但為免你哋麻煩同尷尬，今日係唔會除衫！」即使現場樂迷不斷要求，他仍然拒絕。當唱《世一》結尾時兩度放紙炮，MC被第二響紙炮嚇到由原本情深款款表情、破功失笑，事後他自嘲：「嘩，啱啱嚇死我！」觀眾留意到其表情變化，大讚可愛。
好友陳蕾在MC落台換衫期間，大爆當年MC簽約公司成為師弟後，在一次火鍋飯局，MC上前介紹自己並表達非常喜歡她的歌，卻說錯歌名，「對MC第一印象就係輕浮！死𡃁仔！過嚟撩姐姐講嘢嗰種感覺。」但與MC相處後成為朋友，亦發覺他在數年來成熟了好多。
每次分別都錫錫媽咪
MC亦坦言自小頑皮，有感近年少機會陪家人，最少同媽咪講多謝，母子亦經常爭執，近年他留意到媽咪漸年長，自爆每次見媽咪、在臨別時都有指定動作，「臨走都會攬媽媽錫面珠一啖，係有口水嗰隻！」他認為擁抱是傳達愛意的方法，鼓勵樂迷嘗試擁抱媽媽表達感受。
