曾智華
上周日沙田賽事後，大家心裏有數，今屆冠軍練馬師之爭，已經玩完。
因為方仔勝出六十三場賽事，就算佢唔再贏，沈集成要追四場，廖康銘呢？更要追六場，因廖廄亞季方面唔夠方廄多！
三個馬房到如今，已經鬥到最後一兵一卒，落後兩個，點追幾場頭馬呀？
話說回來，若是沈集成及廖康銘識英雄重英雄，也應對方仔寫個服字。
因論馬數目，大家雖然相若，但方廄之內，並未如沈廄及廖廄般，有馬王級坐鎮。例如單單一隻「浪漫勇士」，已可六W；一隻「白鷺金剛」，也進貢五W。
方廄八十分以上的馬，只得四匹，而沈廄是七匹，廖廄是八匹，陣容比陣容，總結下來，方廄仍可彈離幾W，正是行家一出手，大家心裏有數難度幾高。
賽事至今，方廄的馬其實已經用得很盡很盡，例如今晚出的六隻，一季內出賽頻率已相當驚人，「富心星」（十一次）、「星運少爵」（十四次）、「三軍勇將」（十二次）、「川河石駒」（十一次）、「大千氣象」（十三次）。至於只出五次的「川河帥駒」，則看似未知競賽為何物，次次在後排過終點。
意即方仔都玩到手馬好殘，要「爬」返終點。但就算「爬」，仍以佢機會最大！
今晚方廄，我會捧第三場四班1650米的「大千氣象」，此馬今季未W過，只入過一次Q，搏盡輸頸位，之後冚旗減分，由五十六分變如今的四十九分。
上兩次皆由拉叔執韁跑同程，兩皆出閘輕輕甩甩哋，然後用相當「柔」的韁繩策騎，沿途走位未見精靈，仿似隨意跟跑而回，兩皆第五，輸兩個馬位左右，意即只要肉緊多少，認真多少，搏命多少，入位甚至W唔難。
係今晚喇啩！