曾智華
英國皇家雅士谷大賽，基本上又唔好睇又唔好買，跑足五日，流流長，無癮！
點解唔好睇？因不少場次出三十隻馬，完全唔知邊隻打邊隻，點睇？最弊冇沿途號碼彈出，真真令人一嚿雲。大佬，咁搞法，點買呀？
事實，不少馬評家都跌碎眼鏡，提供四隻貼士，隨時一隻都冇影，不停食白果，從未如此瘀爆過。
好嘞，終於跑完，可以講返本地賽事。
小弟素來強調，凡讓磅級制賽，必須𥄫實巴度，因此君騎功勁，但平時多冚旗，只擇肥而噬，佢可騎最輕磅馬，一遇讓磅，立即如虎添翼。
明日兩場級制賽，巴度皆有機會W出。首先是「精英盃」跑千四米，佢蝕磅都上陣，原因當然唔簡單，呢匹「韋金主」由韋達練馬師團體擁有，今季大熟大勇，近八場兩W三Q一P兩第四，已經加到九十四分，仍應未盡，今次再搏，必須投下一注。同場孭晒飛大熱的，應為「時時歡聲」，報名時配鍾易禮，一排位變莫雷拉。點解？明顯，告仔想殺晒兩場級制賽！
另一場級制賽為「精英碟」跑千八米，睇報名已見告東尼心思，出三隻，分別為「美麗同享」、「加州動員」及「君子傳承」。本來分別配艾道拿、巴度及楊明綸，豈料排位一出，全部換人，變成莫雷拉、希威森及蔡明紹。
巴度去咗邊？改騎「百賀飛駒」，點解呂健威飛起原來的何澤堯（呢場冇馬騎而改用巴度）？應是認為巴度更有把握發揮呢匹G1馬，而巴度揀騎，也見心意。
兩場級制賽如此布陣，我會先買一條巴度WP二串三過關。然後再以巴度馬拖同場的告東尼馬Q及PQ，落齊注後，攤喺沙發扮演父親大人享受父親節，邊歎仔女提供的日本刺身邊嗌馬。