(曾智華)
今日篇稿，刻意延後六日才刊出，點解？因唔想被指為阻人發達。
講乜？正是講以「打到飛起、打爆全球」作宣傳口號的電影《火遮眼》。
上畫第一日，我已飛身入場，大有期待，因此片由個人心目中全球最勁的武術指導谷垣健治擔正執導演筒，理所當然，必定打到開花，絕不會令武術迷失望。
中唔中？中到開巷！真真正正由頭打到尾，尤其主角謝苗，你冇得唔服，拍此片之前，肯定曾受地獄式訓練，操到最後一滴腎上腺素都用盡。而拍此片時，則捱到喊救命，因導演簡直當佢人肉機器，要求之高，收買人命。單單開場十分鐘穿著人字拖通街喪跑，狂追綁架女兒的貨車，已見設計者的瘋狂，唔多當謝苗係人。
片中個個皆真正武術高手，大部分純用拳腳，吓吓打真軍，拳拳皆到肉。一面睇，一面覺得呢位導演，將武打演員用到不單盡，兼且逼到過晒每人的極限。
《火遮眼》描述一個綁架兒童的殘暴集團，如此設計一擺出嚟，經已令人髮指，唔打爆班惡棍唔得。故此，一開波觀眾已敵愾同仇，義憤填膺。更甚，主角謝苗愛女被綁，更理所當然上晒腦，誓要將綁匪碎屍萬段殺清光。
簡單戲路，開始已知結局，荷里活不知幾多部電影拍過，冇乜新奇。一切，只睇謝苗儆惡懲奸的手段及過程。
過程？當然是打呀打，打完又打，打完再打，本來是極度刺激的連場血腥拼搏，頭三十分鐘的確令人血脈沸騰。但連我自己都唔敢相信，打打吓，竟然瞓鬼著。
十五分鐘後紮醒，劇情完全可以連接，當然又係繼續打呀打。終於打到我滯晒，九十分鐘後離場。老友，你喜歡食拖羅？若係咁質你食，六件後都頂唔順投降啦，係嘛？