曾智華
認識不少老友，打工生涯幾十年中，因工作需要，日日勉強依起棚牙，應酬諸色人等，勁累，故此一退休即揚言Enough Is Enough，縮返入自己個Comfort Zone內，假惺惺的應酬場合全部謝絕。
表表者為輝哥吳錫輝，你真係唔使旨意佢出席社交場合，認識陌生人。
但老朋友聚會，則早早Mark死落日記簿，保證準時出席。
最過癮，次次晚飯後，佢例必大包小包外賣挽回家慰妻，正外賣大王！
兩個月前佢話：「肥碌，6月8日切勿安排飯局，我唔得閒，因馮添枝80大壽，老友半世紀，必須親身致賀！」
席設賽馬車會，只容五十人，獲邀出席者盡顯江湖地位！
當晚上世紀六十年代樂手傾巢而出，重點嘉賓乃贊助全場名酒的鄭東漢，佢六十年前與馮添枝乃香港最頂尖的兩位結他手，鄭屬Playboys樂隊，馮則是Mystics靈魂，次次上台都會暗暗較勁，但亦識英雄重英雄，成為一生一世好朋友、好兄弟。
晚宴中，難得一見為陳秋霞，一頭閃閃生光銀髮出現（冇染黑，證明信心十足），一開口，功架猶在，可惜不會再公開演出了。
另一巨肺歌后為伍麗明，乃已經離世歌手陳任的妻子，中氣足、中音準、高音甜，百分百歌星底子。
問題在，佢於樂壇初露頭角一刻，已被陳任「收歸己有」，故從冇踏上歌手的路，只在私人派對亮聲，唱Connie Francis及Cilla Black的名曲，簡直獨步香港，一曲《You Are My World》已電瓜現場聽眾。
馮添枝賀完80，明年到另一樂壇巨人鄭東漢，到時可能要去紅館搭大舞台，才能容納晒佢一手捧出的紅爆歌手啊！