曾智華
全世界都在講AI，唔識就似Out Out哋。但小弟觀察這次熱潮，肯定裏面埋藏不少混水摸魚博大霧的部署。
大家在沖昏了頭腦前，可聽聽近如長實李澤鉅（當然背後有李嘉誠的深層次智慧），遠如股神巴菲特，以及橋水基金（世界最大的避險基金公司）創辦人瑞蒙達利歐的警告，一場由AI而成的投機泡沫，已經形成，只要有一個突如其來的原因，即可Trigger出一場驚天動地的大型金融災難。
對，一切未發生前，初生之犢又或是準備上下其手的利益中人，必定會指以上的警告全屬過時，老人經驗已不合這次的AI狂潮，因為——This time is different。
拗都無謂，很快，當SpaceX及OpenAI上市，炒個天翻地覆一輪後，大家將會見到真章。
今日不如講講機械人，內地發展到嘭嘭聲，但香港呢？
似乎除咗商場內四圍走負責清潔的，其他，仿似真人的，完全唔見。
好奇之下，拉住科技專家阿E問個究竟。
「碌Sir，機械人不似電動車，可以話嚟就嚟。電動車，只要有代理、有市場，就可立即過河到港，技師在此訓練，零件隨時運到，非常方便，故供應可以爆炸性。但機械人完全未成氣候，肯定有排都未能在港普及。」
E哥指出，如今機械人的市場並未出現，兼且要過河（深圳河），成本會好貴。
最弊，一旦出問題要維修，就企咗喺度，因香港冇技師、冇零件，一如以前香港罕有歐洲車，一跪低，單單由歐洲訂零件運港，已經貴到飛起，完全冇可能普及。
「養」機械人，至今仍未成「身份象徵」，而又顧慮多多，我哋有排都只會得個睇字。