曾智華 精彩人生自己創
香港回歸前，認識不少紀律部隊及法律界朋友，不約而同表示，英國人訂的法律，簡直天羅地網，若有需要，點都搵到條罪告你，不過，絕大部分時間是立法嚴，執法鬆。
當時有位老差骨話：「最易告為『油雞』（即遊蕩罪），總之，你一行出街，覺得你可疑就拉得！」
引得我好奇，立即翻查此罪。
咦，果然幾「鬆」吓喎，此乃《刑事罪行條例》第160條，只要你在街上閒晃，被懷疑有特定違法意圖或造成公眾滋擾，基本上就拉得，包括：
一、意圖犯可逮捕罪行——任何人在公眾地方遊蕩，意圖犯可逮捕的罪行（例如爆竊）。
二、故意妨礙他人——任何人在公眾地方，以任何方式故意妨礙他人使用該公眾地方。
三、導致他人合理擔心自身安全——任何人單獨或結伴在公眾地方遊蕩，導致他人合理地擔心自身安全或利益受損。
以上三項若被起訴，一經定罪，全部最高可判監禁，由六個月至十年不等！
事實，以上三項，彈性可以好大，黑白並不分明。經常聽到執法者拉人後，被捕者大喊無辜時，反應多為——同法官講。
今日講遊蕩罪，因最近天氣熱到爆錶，小弟再不能到運動場急步，只可能躲到港鐵站內行，但不停聽見大大聲廣播——港鐵站內不准遊蕩，你可能會被起訴。
不少港鐵站經常有藍帽子巡邏，咁，會否有一次見到我呢位大叔唔搭車，而只行來行去，覺得「形跡可疑」，截查再拉返差館先講呢？我絕不擔心，但就不停見到藍帽子截查可疑人。截的，老老實實，若我是警察，都會查佢哋。無謂形容，以免大家話我歧視。總之，若你咁款出現港鐵站，必定十次有九次被查身份證。