一撞激起千重浪。
好多人話——跑馬就是這樣的了，去解釋不合理現象，仿彿在這個真金白銀投注的競賽中，一切皆可不公平地進行，然後大家「嗗」聲吞咗佢就算。若真如此，乜都唔使搞啦，連競賽小組班專家都炒埋，慳好多錢喎。
當然唔得！就算係戲，也要做到真的一樣，好好醜醜都要搞到公公道道，過得人過得自己，尤其在國際行家面前。
我講乜？正是香港一場國際一級賽「遮打盃」，繼續引起國際策騎界大辯論。原因？涉及兩位天王級騎師，另外，涉及冠軍獎金七百多萬元。
國際殿堂級退休騎師戴勝，對這場麥道朗的跑法及競賽小組判決發表睇法，非常專業，也可見騎師表現，如今在高科技鏡頭下，根本無所遁形。
眾多國際高手分析，小弟認為曾在香港策騎，如今為一流評馬高手的戴勝，最具見地。佢指出，「浪漫勇士」在直路的跑法，絕不可能輕判不小心策騎，只罰停賽三天及罰十二萬元，實在太太太輕。
再三觀察，當時麥道朗根本在打蟊波——將手肘高高舉起，騎姿完全變形，壓向身旁正在衝上的「大怪奇」，動機是阻止莫雷拉爭勝。
戴勝引述多個先例，如此「打蟊波」，最少罰兩至三個月停賽。
這次排山倒海評論，絕對是馬會競賽小組及麥道朗策騎紀錄的一項無法磨滅的污點，絕不可用「跑馬就是這樣的」輕輕抹去，究竟會否間接影響「浪漫勇士」成為馬王，且拭目。
今晚快活谷，擺明方嘉柏及沈集成為冠軍榮譽繼續泥漿摔角。我最有興趣觀察郭富城的「武林寶典」表現，休息半年再出，這匹是「潘大衛寶藏」，若身體回復健康，可以一放絕塵㗎。