印度多地出現接近攝氏50度高溫，有一說是印度網民熱議，中國佔了喜瑪拉雅山，搞到印度局住接受悶熱氣候云云。大佬，你想點，炸咗呢座山？不如請齊天大聖幫手，去搵鐵扇公主同你降溫啦。一笑。
幾年前，大廈忽然停電，點瞓得著？攝氏30幾度，於是把心一橫，帶齊銀包信用卡，準備Walk-in區內酒店，幾貴都在所不惜。此時，是2021年炎夏，內地出現廣泛地區供電不力，原因煤價大漲、火力發電機老舊「打柴」，多個省市包括廣東和上海都下了「限電令」。中外新聞熱論「這就是中國」，弦外之音，中國隨時因為電力問題，造成經濟建設退步，再者，中國都唔係想像中咁強啫。
香港沒有缺電，也沒有限電，那天只是「有咁啱得咁橋」。今時今日，中國電力有改善嗎？國家能源局數據顯示，內地市民用電越用越好，即係品質有保證，再無咁容易「死火」——中國再生能源發展進入快車道，2024年中國再生能源發電規模首超煤電，並提前六年實現2030年風能和太陽能目標。
印度面對的不是攝氏50度而係政治——莫迪政府推出「抵制中國製造」新政策，據稱間接導致印度在熱浪下，面臨嚴重空調短缺與斷電危機。咁，就難搞啊，印度經濟好景，城市中產人口迅速增加，這班新興階層最怕熱，如果出現內地幾年前的「限電令」，必有民怨，選民一旦遷怒於總理莫迪，隨時變成不穩因素，若然如是，莫講孫悟空，唐三藏都「摱」你唔到。